You Know Who

اول ما نزل هالفيلم اشتريناه على سي دي و ضلينا سنين و سنين نحضره و نضحك و نعيد فيه انا واختي لحد ما حفضنا كل كلمة بالفيلم. حرفيا كل سطر و كل كلمة انقالت بالفيلم كنا حافضينها.

واليوم و بدافع التسلية و التجريب و بعد ما صارلنا يمكن اكثر من ١٠ سنين ما حضرنا الفيلم رجعنا حضرناه كمان مرة! و
الصراحة ما كنت متوقع اني رح اتقبله و استمتع فيه لهالدرجة.

كمية ضحك و متعة مش معقولة طلعنا فيها، و اكتشفنا انو ما زلنا حافضين تقريبا كل الكلام و منردد كل الحكي كاننا احنا اللي منمثل و كمان مرة بنضحك و منقضي وقت حلو.

عشان اكون صريح، تقييم هالفيلم و تحديد مستواه الفني شيء صعب و معقد بالنسبة الي. فمثلا طول عمري كنت مفكر انه بس فيلم سخيف و اهبل و انه بس احنا متعودين عليه و انه كل الموضوع بس نوستالجيا. بس اليوم اكتشفت انه الموضوع اكثر من مجرد نوستالجيا، انا فعلا شايف انه في شغل سينما حقيقي بالفيلم، وفي محاولة جيدة لتكوين بعض الشخصيات و تقديمها بطريقة ذكية ولو انها مش شخصيات معقدة. الدراما ببعض المشاهد كان جيد، رسائل الفيلم جميلة، حضور مؤثر لبعض الصراعات الداخلية خصوصا لشخصية اللمبي/رياض و كمان في مجهود جبار بل و استثنائي للممثل احمد سعد، اللي عمل دور ايقوني... نعم ايقوني... لما نص الشعب الاردني و لمدة سنين صار يحكي و يتصرف مثله و يقول و يستهلك نكته و يقلد ستايله فمعناها هو نجح نجاح كبير، وانا متاكد انه هالاشي كان موجود بدول اخرى و بما اني حاليا عندي خبرة اكبر و فهم اكبر من السابق باساسيات صنع الافلام و بمتطلبات التمثيل فانا شايف انه عمل كاراكتر استثنائي و انه مستوى اتقان احمد سعد للدور و قدرته على الابداع بالهبل شيء مش عادي. الكوميديا صعبة يا جماعة! والله صعبة و بتختلف من شخص لثاني!

طبعا انا على يقين باخطاء الفيلم و ضعف السيناريو ببعض النواحي و بسخافة بعض المشاهد و عدم منطقيتها و سوء تصويرها و اخراحها و منتجتها و ثقالة دم و ضعف اداء الممثلة اللي عملت دور فيحاء و كثير اشياء. اناعارف انه الفيلم مش عظيم، لكنه ادى وظيفته الاساسية و فيه نواحي كوميدية و درامية جيدة و فعالة و فيه بعض المجهودات و القدرات الابداعية اللي تستحق الاشادة فيها كمان.

اتمنى اذا في اي حد بقرأ هالحكي اساسا و عنده راي مخالف او موافق او اي كان يحكيلي، انا بحاجة اني اسمع آراء عن هالفيم!